contact
 administraziun:

 Cumün da Val Müstair
 Forum cumünal
 7537 Müstair

 Tel: +41 (0)81 851 62 00
 Fax +41 (0)81 851 62 01
 administraziun@cdvm.ch

 


 




Ün cordial bainvgnü in Val Müstair !

La Val Müstair es circundada d’üna chadaina da muntognas imposanta. Al fuond da la Val, però fingià i’l Tirol da Süd, as preschainta l’Ortler in möd majestus sco üna perla in seis büschmaint da glatsch etern. Da la vart dretta da la Val as derasan stupends gods masdats e da la vart schnestra dominescha per gronda part il god da larsch, chi’s bogna i’l sulai. Bundant ün terz da la surfatscha da god ha la funcziun da proteger las fracziuns, las aglomeraziuns e las vias cunter forzas imprevisiblas da la natüra. Illas fracziuns vivan ils Jauers, ün pövelet simpel e modest. Lur menatalità es cordiala ed averta, uschè cha eir il giast chatta dalunga il contact culla glieud indigena. La lingua dals Jauers es il rumantsch, chi vain discurrü da bun otanta pertschient dals abitants. Quist s-chazzi cultural, chi’d es periclità, vulain nus mantegner eir in avegnir e quai sarà be pussibel, scha la lingua vain discurrüda e datta inavant da generaziun a generaziun. In Val Müstair regna üna vita culturala multifaria. Societats da musica, da chant, da teater e otras plü, pisseran per vita e trategnimaint illas fracziuns e per üna egualisaziun invers il minchadi da lavur. .

Eir scha la Val Müstair es gnüda declerada davart dals scienziats sco regiun sainza potenzial da svilup, eschan nus Jauers listess optimists, chi renda d’investir tuot nossas forzas e nossas ideas in realisond progets innovativs per ün svilup e progress in nossa stretta patria. La Val Müstair sto pudair spordscher eir in avegnir plazzas da lavur e garantir uschè l’existenza per famiglias chi’s decidan da vulair viver quia. Nossas finanzas cumünalas nu permettan gronds sagls, però l’uniun e nossa mentalità han adüna darcheu demuossà eir i’l passà, cha insembel eschna ferms ed uschè avarà eir nos cumün i’l avegnir schanzas da’s sviluppar e da prosperar!

 

Jau Til/Tilla giavüsch üna lectüra divertaivla ed infuormativa sfögliond in nos cudesch d’internet!

 

Rico Lamprecht

president cumünal